Данските власти денеска потврдија дека гасоводите Северен поток 1 и 2 во Балтичкото Море на крајот на септември претрпеле голема штета и дека тоа било предизвикано од силни експлозии.
Полицијата во Копенхаген соопшти дека спровела серија истраги на „местата на злосторствата“, со помош на припадници на данската армија и во соработка со данската безбедносна и разузнавачка агенција.
Данскиот министер за одбрана Мортен Бедсков рече дека ситуацијата е „многу сериозна“ и дека „во никој случај не е случајност“.
– Тоа не изгледа само планирано, туку многу добро испланирано, рече Бедсков.
Данската разузнавачка агенција и полицијата одлучија да формираат заедничка група која ќе се занимава со натамошната истрага на инцидентите, соопшти полицијата, додавајќи дека не може да се каже кога може да се очекува таа да биде завршена.
Шведската агенција за безбедност неодамна соопшти дека нејзината прелиминарна истрага за истекувањата од двата гасовода, поблиску до шведскиот брег, „покрена сомнеж за сериозна саботажа“.
Во меѓународните води, но во рамките на ексклузивната економска зона на Данска и Шведска, имаше четири истекувања на цевководите Северен поток 1 и 2, што неколку дена испуштаа големи количества метан, што има ефект на стакленички гас.