Тунелот ќе биде изграден во Балтичкото Море на длабочина до 40 метри и ќе го скрати времето потребно за патување помеѓу Данска и Германија. Отворањето на тунелот е планирано за 2029 година.
Планирањето на тунелот именуван како Fehmarnbelt Tunnel (Fehmarnbelt Fixed Link) траеше повеќе од 10 години, а изградбата почна во 2020 година и тоа неколку месеци по завршувањето на работите на привременото пристанишпте на данската страна. Во ова пристаниште ќе се наоѓа фабрика која ќе произведе 89 огромни бетонски делови кои ќе го сочинуваат тунелот.
„Првата производна линија ќе биде спремна до крајот на оваа или почетокот на наредната година. До почетокот на 2024 година ќе бидеме подготвени да го ставиме во вода првиот елемент од тунелот“, изјави директорот на данската компанија Femern A/S која е задолжена за проектот.
Тунелот ќе биде долг 18 километри и е еден од најголемите европски инфраструктурни проекти со буџет поголем од 7 милијарди евра. За споредба, тунелот кој ги поврзува Англија и Франција, познат како Евротунел, Каналски тунел и Чунел, е долг 50 километри, завршен беше во 1993 година, а чинеше 12 милијарди фунти во денешна вредност. Иако е подолг од Фемарнбелт тунелот, Евротунелот беше направен преку бушење со помош на машини, а не со потопување однапред направени делови.
Новиот тунел е дизајниран како алтернатива на траектната линија од Редби на островот Лоланд во Данска до Путгарден на островот Фемарн во Германија, која годишно превезува милиони патници. Возењето со траект трае 45 минути, а со воз тоа време ќе се намали на само 7. Со автомобил ќе биде околу 10 минути.
Кога ќе биде завршен, овој тунел ќе биде најдолгиот на светот кој комбинира автопат и железница. Ќе се состои од две насоки со дупли ленти, кои ќе ги раздвојува сервисен премин, а дел од него ќе бидат и две железнички пруги. Позитивно ќе се одрази и на товарните камиони и возови бидејќи тунелот ќе создаде рута помеѓу Шведска и Централна Европа која ќе биде за 160 километри пократка од сегашната.
