Фудбалската репрезентација на Данска на гостински терен ја совлада репрезентацијата на Ирска со 5:1 и обезбеди пласман на Светското првенство во Русија кое ќе се игра наредната година.
Ирците стигнаа во водство уште во шестата минута, кога дефанзивецот Дафи искористи една гужва во казнениот простор и со глава успеа да ја смести топката во мрежата.
Но, веднаш потоа Данска ја презема теренската иницијатива и резултатот беше израмнет во 29-та минута, кога Кристенсен ја погоди мрежата на Ирска, а само три минути подоцна Ериксен со прекрасен погодок ги врати Данците на вистинската патека.
Потоа Ериксен ја поведе Данска кон тотално уништување на противниците, и го заокружи својот хет-трик со уште два одлични погодоци.
Конечните 5:1 ги постави Никлас Бендтнер со погодок од белата точка.
Данска стана 14-та европска репрезентација која се пласираше на Мундијалот, заедно со Белгија, Англија, Франција, Германија, Исланд, Полска, Португалија, Србија, Шпанија, Хрватска, Швајцарија, Шведска, и домаќинот Русија.