Симон Кјер, капитенот на данската репрезентација, ја критикуваше ФИФА дека се заканува со жолти картони на капитените кои ги носат капитенските ленти One Love, кои се во боите на виножитото.
Лентите One Love промовираат инклузивност кон ЛГБТИК+ луѓето, а начелниот план беше капитените на голем број национални тимови да ја носат лентата на Светското првенство. Сепак, по заканата на ФИФА, репрезентациите се откажаа.
„Луѓето сега велат дека требаше да ризикувам и да ја носам таа лента, но тоа е лесно да се каже. Ако добијам жолт картон во петтата минута, го оставам тимот со играч помалку речиси цел натпревар. Не можам да им го направам тоа на моите соиграчи“, изјави Кјер по натпреварот против Тунис (0:0).
„Смешно е што ФИФА нè става во оваа ситуација. Таква забрана е незамислива во средината од која доаѓам, за општеството во кое пораснав и вредностите што ги ценам. Нема смисла“, додаде Кјер и најави дека Данците би можеле да ги здружат силите со другите репрезентации за да се борат против одлуката на ФИФА.
