Фудбалерот на Манчестер Сити, Кевин Де Брујн, верува дека ја заслужува наградата за најдобар играч во Премиер лигата, за која, покрај него, голем фаворит е и напаѓачот на Ливерпул, Мохамед Салах.
„Па, ако ја добијам, тоа би било убаво и за екипата и за мене. На еден начин верувам дека ја заслужувам, бидејќи бев многу конзистентен во својата форма“, изјави Де Брујн.
Играчот за врска на Сити е фаворит за освојување на наградата, во однос на неговата конзистентност во текот на оваа сезона, како и фактот дека оваа наградата најчесто му се доделува на играч чиј тим ќе ја освои титулата, која Сити има прилика да си ја обезбеди токму овој викенд против лутиот градски ривал Јунајтед.
Сепак, учинокот на Белгиецот не може да се спореди со феноменалната статистика која зад себе ја има Салах.
Салах во својата дебитантска сезона во дресот на Ливерпул е најдобар стрелец во Премиер лигата со 29 погодоци, а во повеќе наврати ја воодушеви фудбалската јавност со својата игра.
Според Де Брујн, едноставно е невозможно тие двајца да бидат споредени како играчи.
„Не можете да споредите, невозможно е. Како се бираат играчите? Секој има свое мислење и зависи од тоа што луѓето бараат во играчот. Салах има неверојатен учинок и игра многу добро во улогата напаѓач. Оваа сезона беше фантастична. Но, како ќе не споредите според статистиката? Тоа е сосема поинаку. Против Евертон имав дефанзивна улога во средината на теренот, а тоа не можете да го споредите со некој напаѓач“, изјави Де Брујн.
Овие двајца играчи веќе во среда ќе бидат под лупа на фудбалската јавност, кога Ливерпул и Манчестер Сити ќе ги измерат силите во првиот натпревар од четвртфиналето од Лигата на шампионите.