Легендата на Рома требало да го слави роденденот на својата сопруга на денот кога неговиот тим го играше градското дерби со Лацио, па успеал некако да ја измами да слават во паб за да гледа фудбал.
Даниеле Де Роси викендов бил во Лондон каде неговата сопруга Сара Фелбербаум требало да го прослави својот роденден. За беља на римската легенда големото Дерби дела Капитале се играше токму в недела од 18 часот, па Де Роси се нашол во тесно.
Наместо во некој отмен ресторан, ја наговорил сопругата да слават роденден во еден од бројните лондонски пабови со тајна цел - да го гледа дербито Лацио - Рома.
Сара сфатила дека е измамена, па решила да се пофали на Instagram каде објави стори сликајќи го Де Роси како воопшто не ѝ обрнува внимание за роденденот и е целосно внесен во дербито.
„Срце, те носам во Лондон за твојот роденден...“, напиша Сара на сторито.
Де Роси ја шерна нејзината објава додавајќи: „Сакаше изненадување??? Дерби во Лондон од 6 додека јадеш пржено пилешко. Епа поголемо изненадување од ова...“.
Со оглед на тоа што Рома загуби со 1:0 можеме само да замислиме во какво (не)расположение бил Де Роси во остатокот од вечерта.
Де Роси речиси целата своја кариера ја мина во Рома. Како дете прво тренираше во нисколигашот Остиа Маре и тоа како напаѓач, а на 17 години премина во Рома каде под Фабио Капело по една година дебитираше во првиот тим, но како играч од средниот ред. По 20 години во Рома, играјќи 616 натпревари во сите натпреварувања на кои постигна 63 голови, замина во аргентинскиот гигант Бока Жуниорс за да ја исполни желбата да заигра пред навивачите на „Ла Бомбонера“. Се пензионираше во јануари 2020 година на 36-годишна возраст.
Инаку, Сара Фелбербаум е поранешен модел и италијанска актерка. Родена во Лондон од мајка Британка и татко Американец, кои се преселиле во Италија кога Сара имала само една година. Во брак со Де Роси е од 2015 година и имаат две деца, ќерка и син.
