Фудбал

Дебакл на Челзи, Сари не се поздрави со Гвардиола

11. февруари 2019 - 9:06 | МИА/КАЈГАНА

Тренерот на Челзи, Маурицио Сари, не се поздрави со колегата од Манчестер Сити, Пеп Гвардиола, по поразот во натпреварот од англиската Премиер лига.

Шпанецот тргна кон Сари на поздравување како што е вообичаено по завршувањето на натпреварите, но италијанскиот стручњак не се ни сврти кон него и си замина во соблекуваните.

Челзи синоќа загуби од Манчестер Сити со 6:0 што е негов највисок пораз уште од април 1991 година. Тогаш „сините“ загубија од Нотингем форест со 7:0.

Сари не се произнесе за неговата иднина во клубот од „Стемфорд бриџ“ по највисокиот пораз во последните триесетина години.

– Мојата иднина? Прашајте го клубот за тоа, одговори Сари на прашањето од англиски новинар дали ќе поднесе оставка по високиот пораз од Сити.

Италијанецот додаде дека неговите избраници направиле многу грешки, но потенцира дека против себе имале фантастичен тим.

– Направивме многу грешки. Противникот играше фантастичен фудбал. Сакавме да извршиме притисок на почетокот на играта, но нашиот план беше целосно уништен. Тие возвратија со контра удар и не можевме да реагираме правилно, додаде Сари.

Челзи е на 6. место во Премиер лигата со 50 бодови по 26 одиграни натпревари.

Коментирај