Андреа Музи, 21-годишен Италијанец, е победник на годинашното Светско првенство во помнење (World Memory Championship) во Германија.
Меѓу другото, Андреа успеа да запомне 630-цифрен број во рок од пет минути, изјави организаторот на натпреварот Штефен Буто за dpa, додавајќи дека, доколку се потврди официјално, тоа ќе значи дека го соборил светскиот рекорд.
Музи беше прв во сите десет дисциплини како дел од натпреварот MemoryXL, каде што постигна рекордни 8.594 поени, што го стави на самиот врв меѓу 1.700 натпреварувачи, рече Буто.
Натпреварот се одржа во источногерманскиот град Торгелоу.
Светското првенство во помнење е организиран натпревар што се одржува континуирано од 1991 година, со исклучок на 1992 година.
Учесниците се обидуваат да запаметат што е можно повеќе информации во даден период во десет различни дисциплини, вклучително и помнење броеви во рок од еден час, помнење броеви во рок од пет минути, историски датуми во пет минути, помнење низи на зборови, помнење бинарни цифри во рок од триесет минути или помнење на редоследот на измешан шпил карти.
