Селекторот Благоја Милевски упати дополнителен повик за дефанзивецот на домашниот шампион Струга, Бојан Илиевски.
Илиевски игра како стопер, но е варијабилен и може да игра и како десен и лев бек. Летоска од Македонија ЃП се пресели во актуелниот шампион, за кој сезонава ги одигра сите 14 натпревари во првата лига зачинувајќи ги со 1 гол и 3 асистенции. Има еден настап за репрезентацијата, кога влезе од клупата на пријателската со Саудиска Арабија во октомври 2022 година кога Македонија настапи со играчи од домашната лига.
Од ФФМ не соопштија на што се должи дополнителниот повик, но од претходно кажаното од селекторот, дека стоперот Висар Муслиу го мачи повреда, или мали се шансите тој да може да игра или Илиевски е повикан за секој случај.
Репрезентацијата синоќа ги почна подготовките за дуелите в четврток со Латвија и в недела со Фарски Острови, двете на домашен терен на Арената во Скопје.
