Одличниот Един Џеко го сврте натпреварот на Интер против Сасуоло откако влезе од клупата, постигна гол и изнуди пенал за освојување на три бода. Голот му донесе израмнување на рекорд стар 24 години, а поставен од Роналдо.
Со синоќешниот погодок Џеко го израмни рекордот на легендарниот Роналдо постигнувајќи 6 гола во првите 7 кола. Последниот кому му успеало вакво нешто беше токму еден од најдобрите играчи на сите времиња, во сезоната 1997/98, играјќи токму за Интер.
Во изјава за медиумите по натпреварот, Босанецот рече дека Интер има многу талентирани играчи и дека не може секој да игра во првиот тим, но дека секогаш се обидува да даде 100% од своите можности и да му помогне на тимот.
„Влеговме во игра за да направиме разлика во нашата игра бидејќи тренерот тоа го побара од нас пред замените. Имаме многу талентирани играчи кои не можат да бидат на теренот во исто време“, рече Џеко на почетокот од разговорот со Sky Sports Italia и продолжи:
„Кога ќе влезете во игра, треба да дадете повеќе од 100%, а тоа и го направивме и на крајот се исплатеше“.
Популарниот Плави дијамант понатаму рече дека очекувал ефикасен почеток на сезоната и дека тоа е и причината зошто дошол во клубот. Сепак, Интер сѐ уште нема постигнато гол во Лигата на шампионите, па Џеко одговори и на две прашања.
„Нема објаснување зошто е тоа така, а лесно е да се суди додека седите во фотелјата пред ТВ. За жал, ние сѐ уште немаме постигнато гол во Лигата на шампионите, но ова е исклучително важна победа во Серија А“, вели тој.
„Очекував да ја започнам сезоната силно, ги знам моите квалитети и затоа Интер ме доведе во своите редови. Секогаш го давам својот максимум, без разлика дали сум во стартниот состав или влегувам од клупата“.
За потсетување, Џеко влезе од во игра во 57. минута кога Интер губеше со 1:0. Само 30 секунди подоцна, по асистенција на Иван Перишиќ, постигна брилијантен гол со глава за 1:1, а во финишот на натпреварот врз него беше направен прекршок за пенал, кој го реализираше Лаутаро Мартинес носејќи му три бода на својот тим.