Навивачите на кошаркарскиот клуб Црвена ѕвезда синоќа одржаа протестен собир пред амбасадата на Црна Гора во Белград.
Откако илјадници „делии“ ја отпеаја српската химна „Боже правде“ следеше обид за палење на црногорското знаме со огномет.
„Делиите“ по натпреварот меѓу Црвена ѕвезда и Баерн во спортската хала „Арена“, се упатија кон црногорската амбасада каде ги дочека друга група. По протестот навивачите мирно си заминаа од пред Амбасадата на Црна Гора во центарот на Белград.
Навивачите по натпреварот дојдоа на популарната „Кнез Михајлова“ и пред амбасадата, што се наоѓа во една повеќекатница протестираа заради носењето на Законот за слобода на вероисповед во Црна Гора.
Притоа „делиите“ ги повикаа и другите навивачки групи да им се придружат на нов протест закажан за1 7 јануари, што дел од нив веќе го најавија.
На протестот имало полицијаци во цивилки, но не и униформирана полиција, јавија српските медиуми.
Навивачите пред амбасадата, која се наоѓа на повисоките катови од зградата, испалија пиротехника, гаѓајќи повеќепати со ракети за огномет во знамето на Црна Гора.
„Делиите“ исто така скандираа „Црна Гора и Србија, тоа е една фамилија“.