Делта сојот е најбрза, најиздржлива и најопасна верзија на коронавирусот со која светот се соочува, тврдат виролози и епидемиолози, пишува Reuters.
Вакцините и понатаму даваат силна заштита во одбрана против тешки инфекции и хоспитализација предизвикана од која било верзија на коронавирусот, а оние кои се во најголем ризик и понатаму се невакцинирани, тврдат експерти.
Главната грижа околу делта сојот, првпат идентификуван во Индија, не е во тоа што луѓето имаат потешки симптоми, туку многу полесно се шири од човек до човек, зголемувајќи го бројот на инфекции и хоспитализација меѓу невакцинираните.
Има сè повеќе докази дека е во состојба да зарази сè поголем број целосно вакцинирани луѓе за разлика од претходните верзии и изразена е загриженоста дека тие и понатаму би можеле да го шират вирусот, тврдат овие експерти.
„Најголемиот ризик за светот во овој момент е делта варијантата“, изјави микробиологот Шерон Пикок, која раководи со британските напори за секвенцирање на геномот на варијантата на коронавирусот, велејќи дека делта сојот е најиздржлива и најбрза варијанта досега.
Во Велика Британија се хоспитализирани вкупно 3.692 луѓе со делта варијанта, од нив 58,3% биле невакцинирани, додека 22,8% целосно вакцинирани.
Во Сингапур, каде делта сојот е најчеста варијанта, три четвртини од случаите се регистрирани меѓу вакцинирани, ниту еден не е тешко болен.
Студија во Кина oткри дека луѓето заразени со делта сојот носат 1.000 повеќе вируси во носот во споредба со сојот во Вухан идентификуван во 2019 година и затоа излачуваат повеќе од вирусот.