Играчот кој се очекуваше да биде втората ѕвезда која ќе го засили тимот на Лејкерс по Леброн Џејмс отиде во спротивна насока и потпиша за најголемиот ривал за шампионската титула, Голден Стејт Вориорс.
Опоравувајќи се од повредата на Ахиловата тетива, Демаркус Казнс е голем ризик за било кој тим, но неговиот квалитет го прави исплатлив ризик за Голден Стејт.
Казнс (27) потпиша едногодишен договор вреден 5,3 милиони долари и наредната сезона ќе послужи како показател дали тој може целосно да се врати по тешката повреда. Сега Голден Стејт Вориорс има петорка составена од 5 Ол Стар играчи: Стеф Кари, Клеј Томпсон, Кевин Дурант, Дрејмонд Грин и Демаркус Казнс.
Во минатата сезона, пред повредата, Казнс имаше просек од 25,2 поени, 13 скока и 5,4 асистенции, заедно со шут од 35% зад линијата за три поени. Тој е огромно засилување за центарската позиција на Вориорс, каде до минатата сезона ротираа Заза Пачулија и Џавел Мекги.
На местото на Казнс во Пеликанс потпиша довчерашниот играч на Лос Анџелес Лејкерс, Џулиус Рендл. Тој потпиша двегодишен договор во вредност од 18 милиони долари и ќе му се придружи на Ентони Дејвис во тимот на Њу Орлеанс Пеликанс во обидот да се обезбеди нов настап во плејофот.
Сегашната ротација на Голден Стејт Вориорс повторно ги става како први и неприкосновени фаворити за освојување на титулата. Покрај петте стартери, тука се и играчи кои влегуваат од клупата како Андре Игудала и Шон Ливингстон, кои и понатаму имаат голем учинок на теренот.