Усман Дембеле ги одигра сите 90 минути од победата на неговиот ПСЖ над Борусија Дортмунд во првото коло од Лигата на шампионите, а француската јавност ја анализираше играта на парискиот напаѓач.
Дембеле одигра потпросечен натпревар, а за тоа говори и фактот што дури 31 пат ја загуби топката, поставувајќи неславен рекорд во елитното натпреварување.
Статистиката покажува дека Дембеле во времето поминато на теренот ја допрел топката 94 пати и во дури 32 отсто од случаите останал без неа.
Француската јавност има сè помалку трпение за Дембеле, кој на седум одиграни натпревари за ПСЖ не постигна ниту еден гол или асистенција.
Го критикуваше и Жером Ротен, поранешниот првотимец на францускиот шампион.
„Проблемот со Дембеле е што секогаш очекувам повеќе од него. Дечкото прави добри работи, но е збунет. Тој сака да ги направи толку добро што претерува. Неговите изданија не се добри бидејќи е премногу возбуден“, рече тој.
Инаку, головите за победа на парижаните синоќа ги постигнаа Мбапе во 49. минута и Хакими во 58. минута од играта.
Дембеле летово пристигна во Градот на светлината од Барселона, каде немаше среќа со повреди, а во минатото настапуваше за Борусија и Рен.
