
На 82. доделување на наградите Златен глобус, во чест на телевизиската и филмската извонредност, Brutalist беше прогласена за најдобра филмска драма во 2024 година, Emilia Perez за најдобар филмски мјузикл, а меѓу најдобрите актери се Фернанда Торес, Деми Мур, Адриен Броди и други.
Адриен Броди доби Златен глобус за улогата во Brutalist, а Деми Мур (62) ја освои наградата за најдобра актерка во мјузикл или комедија за нејзината главна улога во The Substance, приказна за заборавена актерка која ја бара фонтаната на младоста.
Наградата за најдобра актерка во филмска драма ѝ припадна на Фернанда Торес за улогата во филмот I'm Still Here, додека најдобар актер во комедија или мјузикл му припадна на Себастијан Стен од A Different Man. За најдобар актер во споредна улога е прогласен Киран Калкин од филмот A Real Pain, а за најдобра споредна актерка е прогласена Зои Салдања од мјузиклот Emilia Perez.

И режисерот на филмот Brutalist, Брејди Корбет, беше награден со Златен глобус како најдобар во 2024 година, додека најдобар анимиран филм е Tok, најдобар филм од неанглиско говорно подрачје е Emilia Perez, а наградата за најдобро сценарио ја доби Питер Штроган за филмот Conclave.
Златен глобус за хит во кината и на киноблагајните доби мјузиклот Wicked, за најдобра ТВ-серија Shogun, за најдобра хумористична/музичка серија Hacks, а меѓу многуте наградени беа актерите Колин Фарел, Џоди Фостер и други.
Водителка на свеченото доделување на наградите беше комичарката Ники Глејзер.
Ѕвездата на Wicked Аријана Гранде се издвои на црвениот тепих облечена во жолта тоалета на Givenchy со боди со мониста, за која рече дека е почит на патот од жолта тула што води до Оз во мјузиклот.

Добитниците на Златните глобуси ги избираат 334 новинари од 85 земји, наспроти приближно 9.000 гласачи кои ги избираат победниците на Оскарите. Гласачкото тело беше проширено во последниве години, а организаторите иницираа реформи откако беа критикувани за етички пропусти и недостаток на различност.