Акционата аниме авантура „Demon Slayer“ викендов се најде пред „Mortal Kombat“ на американскиот бокс-офис, со заработка од 6.4 милиони долари, пренесе Variety. И двата филма премиерно беа прикажани минатиот викенд.
Во нормални времиња овие бројки ќе беа разочарувачки, но во време на пандемија овие резултати и не се баш толку лоши. Сепак, останува непознато како ќе се покажат очекуваните премиери на потенцијални блокбастери „A Quiet Place 2“, „Black Widow“ и „Fast and Furious 9“, закажани за летово.
„Demon Slayer“ беше прикажан во 1.915 кина низ Северна Америка и заработи импресивни 34.1 милион долари во САД и во Канада. На светско ниво, филмот заработи 423 милиони долари, од кои 368 милиони во Јапонија.
На второто место е „Mortal Kombat“ инспириран од популарната видеоигра, а кој заработи 6.2 милиони долари на американскиот бокс-офис, односно 34 милиони долари по две недели од прикажувањето. На светско ниво, филмот надмина заработка од 66 милиони долари.
На трето место е „Godzilla vs. Kong“, со заработка од 2.7 милиони долари, односно 415 милиони долари на светско ниво.
Хорор филмот „Separation“ се најде на четврто место со заработка од 1.8 милиони долари.
Трилерот „Nobody“ е на петтото место со неверојатни 1.2 милиони долари од шестиот викенд на прикажување.
