Кон крајот на септември почна снимањето на долгометражниот игран филм „Трампи“ по сценарио и режија на Ѓорче Ставрески, а во продукција на Фрагмент Филм.
Филмот ќе се снима на повеќе локации во Скопје во наредните месеци, во период од 38 дена, од 25.09 и 06.11.2024.
Guzzva Casting Agency објави јавен повик за статисти во филмот, наведувајќи дека се бараат луѓе од сите возрасти и не е потребно претходно искуство.
Аудицијата ќе се одржи денеска, 2 октомври, од 15 до 20ч. во просториите на Вардар Филм. Аудицијата ќе се состои само од фотографирање и не е потребна никаква припрема, а ангажманот на статистите се плаќа.
„Трампи“ е втор долгометражен игран филм на Ставрески, кој по големиот успех на „Исцелител“, снима нова, сосема поинаква, но подеднакво интересна приказна.
Главните улоги во филмот ги играат Сергеј Димовски и Стефанија Начевска. Во останатите улоги се: Александар Микиќ, Игор Ангелов, Петар Мирчевски, Душица Настова, Наум Ѓоргиевски, Ана Димитрова, Григор Јовановски и многу други.
Директор на фотографија на „Трампи“ е Дејан Димески, сценограф е Симо Бранов, костимограф Жаклина Крстевска, шминка и маска Јасмина Лилиќ од Р. Србија, дизајнер на звук Лука Шуто од Р. Чешка. Кастинг директор е Билјана Драгиќевиќ Пројковска. Продуценти на филмот се Ивана Шекуткоска и Ѓорче Ставрески, копродуцент е Алзбета Јаначкова.
Филмот е поддржан од Агенција за филм на Р.С. Македонија и Чешки филмски фонд.
