Скопје, 7 август 2019 (МИА) – Времето денеска ќе биде сончево и топло. Ќе дува слаб до умерен ветер од јужен правец, особено изразен во југоисточните делови. УВ индексот ќе изнесува 9.
Утринската температура ќе се движи од 10 до 18 степени, а дневната температура од 28 до 38 степени.
Во Скопје ќе биде сончево и топло. Ќе дува слаб до умерен ветер од јужен правец. УВ индексот ќе биде 9.
Утринската температура ќе достигне до 17 степени, а дневната температура до 37 степени.
Под влијание на многу топла воздушна маса до средината на наредната недела времето ќе биде сончево и многу топло, а само во петок ќе има зголемена облачност.
Од утре ќе биде активирано жолто, а од четврток во некои реони и портокалово ниво за опасност од високи температури.
Препораки на ДЗС за најавениот топлотен бран
Да не се фрлаат цигари и догорчиња, стаклен отпад и стаклени шишиња, да не се пали оган и скара на отворен простор и шума, да не се дозволува децата да си играат со запалки, пламен и жар, да не се пали отпад и друг горлив материјал, ниту стрништа и меѓи, а ако се забележи пожар веднаш да се извести Територијалната противпожарна единица на бесплатниот телефонски број 193.
Ова се препораките на Дирекцијата за заштита и спасување (ДЗС) согласно најавите од УХМР за топлотниот бран што се очекува да ја зафати земјава во наредните денови, особено од четврток до средината на наредната недела, кога ќе биде активирана жолта фаза за високи температури, а во некои региони и портокалова фаза.
Покрај основните препораки за однесување во вакви услови, ДЗС презема и мерки за превентивно делување за заштита од можни шумски пожари и други пожари на отворен простор. Воедно апелира до општините, граѓаните и посетителите на земјава, да внимаваат кога се на отворено.
Дирекцијата потсетува дека од март е донесена забрана за движење во шума и шумско земјиште освен за вработените во ЈП национални шуми, а за зачувување на шумите, од 15 јули до 15 август, на територијата на целата земја, се спроведува Кампањата за заштита од пожари под мотото „Иднината им припаѓа на оние кои се подготвени – Природата е наша одговорност“.
