Научниците предвидуваат дека во следните 300 милиони години Тихиот Океан ќе исчезне и дека на Земјата ќе се формира нов голем суперконтинент, во циклус кој се повторува на секои 600 милиони години.
Новата симулација на „суперкомпјутер“ покажува дека деновите на Тихиот Океан му се одбројани.
Симулацијата се заснова на постојаното движење на тектонските плочи на Земјата. Сепак, овој океан (најстариот на Земјата) има уште 300 милиони години пред себе.
Научниците од Универзитетот Картин во Австралија веруваат дека Тихиот Океан најверојатно ќе биде „проголтан“ пред да го прослави својот милијардити роденден.
Пред самото исчезнување, Тихиот Океан повеќе нема да личи на огромното синило што е денес. Секоја година овој океан се намалува за неколку сантиметри - ова се случува откако беше суперокеан околу последниот суперконтинент - Пангеја.
Научниците објаснуваат дека секоја година неколку сантиметри од пацифичката плоча се лизгаат под евроазиската и индо-австралиската плоча, со што се намалува растојанието помеѓу континентите Северна Америка, Азија и Австралија.
Не сите научници се согласуваат за тоа како ќе изгледа следниот суперконтинент или како ќе се формира, но во многу симулации Тихиот Океан е осуден на пропаст.
Додека некои студии сугерираат дека Атлантскиот Океан, кој денес се шири, би можел да почне да се намалува во иднина, создавајќи суперконтинент опкружен со Тихиот Океан, истражувачите од Универзитетот Картин не се согласуваат.
Наместо да формираат втор континент сличен на Пангеја, тие тврдат дека светот се движи кон суперконтинентот наречен Амазија, каде Северна Америка се судира со Азија.
Австралија е изоставена од ова име, но во 4D геодинамичките модели се чини дека и Австралија игра важна улога во затворањето на остатокот од Тихиот Океан, пренесуваат научни портали.
