Неколку луѓе се убиени во напад што се случи во Чесапик, Вирџинија, околу 22 часот по локално време. Напаѓачот пукал во продавница Walmart, а сè уште не се знае точно колку луѓе се убиени.
Напаѓачот е пронајден мртов во продавницата, изјави портпаролот на локалната полиција Лео Косински.
Полицајците влегле во продавницата и пронашле мртви и повредени луѓе, изјави Косински и додаде дека полицијата сè уште не може да го потврди точниот број на загинати, но смета дека има „помалку од десет“.
Косински верува дека полицијата не пукала, но сепак меѓу загинатите е и напаѓачот. Полицајците сè уште ја разгледуваат продавницата во потрага по жртви.
Градските власти на Чесапик побараа од луѓето да се држат настрана од продавницата за време на истрагата.
Вработен во Walmart се вклучи во живо на социјалните мрежи, кажувајќи им на гледачите дека неговиот менаџер влегол во просторијата наменета за одмор и почнал да пука кон колегите.
Сенаторката од сојузната држава Вирџинија Луис Лукас објави изјава во која вели дека е „апсолутно скршена од тага поради тоа што последното масовно пукање во Америка се случи во Walmart“ во нејзиниот округ.
„Нема да запрам додека не најдеме решенија за ставање крај на оваа епидемија на насилство со оружје во нашата земја која однесе толку многу животи“, нагласи таа.
