Францускиот селектор и поранешен играч на Јувентус, Дидие Дешамп, го советува младиот Ентони Марсијал да ја промени средината и од Манчестер Јунајтед да направи трансфер во италијанскиот шампион.
Крилниот напаѓач оваа сезона има многу мала минутажа и неговата позиција во клубот е загрозена со развојот на Маркус Рашфорд и доаѓањето на Алексис Санчез.
Неколкупати досега Марсијал потенцираше дека би сакал да добива поголема минутажа, но Мурињо има поголеми симпатии кон Алексис Санчез, Ромелу Лукаку и Маркус Рашфорд, па Марсијал најчесто добива шанса од клупата.
Неколку клубови веќе покажаа интерес за Марсијал, а 22-годишникот треба внимателно да размисли каде сака да ја продолжи кариерата. Неговиот следен клуб треба да биде некој каде тој ќе биде стандарден првотимец, бидејќи во моментов се наоѓа во незавидна ситуација и не е дел од репрезентацијата на Франција.
Селекторот на репрезентацијата смета дека следна дестинација на Ентони Марсијал треба да биде Јувентус, каде пред повеќе од две децении фудбалската кариера ја градеше и тој самиот. Претходното лето уште еден играч на француската репрезентација, Блејз Матуиди, потпиша за Јувентус, а и тогаш Дешамп имаше голем удел во одлуката.
„Ајде да речеме дека тоа е мое мислење, но играчите не мораат да ме послушаат. Матуиди направи добар потег, а во моментов Манчестер Јунајтед не е подготвен да го продаде Марсијал. Ќе видиме како ќе се одвиваат работите за неколку месеци“, рече Дешамп.
Последниот гол Марсијал го постигна на 20 јануари и тој беше негов 11-ти во оваа сезона. Во овој момент тој не е дел од француската репрезентација, бидејќи Гризман, Дембеле, Фекир и Жиру имаат предност на списокот на Дешамп.
