Дешан: Зидан е природен кандидат за мој наследник

Селекторот на Франција, Дидје Дешан, кој најави заминување по Светското првенство во 2026 година, рече дека Зинедин Зидан е „многу добар кандидат, природен“ да биде негов наследник.

„Зизу е многу добар кандидат, и би додал потоа природен, не знам дали ќе му се допадне тоа“, изјави Дешан во интервју за францускиот магазин L'Équipe.

Дешан (56) во јануари најави заминување од репрезентацијата на Франција, која ја води од 2012 година. Оттогаш медиумите зборуваат за Зидан како негова замена.

Зидан во досегашната тренерска кариера (2016, 2017 и 2018 година) со Реал Мадрид освои 3 титули во Лига на шампиони. Тој важи за голем фаворит за наследник на својот поранешен капитен во француската репрезентација, која ја освои титулата на Светското првенство во 1998 година на домашно тло и титулата на Европското првенство две години подоцна.

Во меѓувреме, Дешан и француската репрезентација се соочуваат со серија од два натпревара против Хрватска во март за да се квалификуваат во финалето на Лигата на нации.

Дешан во интервјуто потврди дека во селекцијата сигурно ќе биде и напаѓачот на Реал Мадрид, Килјан Мбапе, иако ги пропушти последните два меѓународни натпревари поради тежок период по пристигнувањето во Шпанија.

Во финансиски спор со неговиот поранешен клуб Пари Сен-Жермен и со проблемот со интегрирањето во Реал Мадрид, францускиот напаѓач според шведските медиуми бил вмешан и во случај на силување, пред локалното судство, кое никогаш не го објави неговото име, да одлучи да ја затвори истрагата кон средината на декември.

„Тој ќе биде тука, ако ништо не му се случи дотогаш. Тој е многу приврзан за француската репрезентација иако имаше тежок период. Се врати и тоа е јасно видливо во неговата игра и во неговиот ум“, рече Дешан и додаде дека Мбапе ќе остане капитен на националниот тим.

Првиот натпревар од четвртфиналето на Лигата на нации Франција го игра на 20 март на гости во Сплит, додека реваншот ќе биде во Париз три дена подоцна.