Момче од 12 години се возело од Белград до Загреб закачено под автобус, објави весникот „Слободна Далмација“.
Момчето мигрант успеало во Белград да се пикне под автобус на хрватскиот превозник „Чазматранс“, а според изјавите на очевидци, се сместило во подножјето на возилото и пет часа си го ризикувало животот за да стигне до хрватската метропола.
„Автобусот од Белград тргнал во 11 часот и 30 минути. Некаде пред Иваниќ слушнавме силен тресок под автобусот. Звукот прво беше послаб и потоа сѐ посилен. Кога застана автобусот, малечкиот излезе целиот валкан од просторот меѓу тркалата. Се тетеравеше, се гледаше дека е во шок“, раскажа за „Слободна Далмација“ Анѓелко Нежиќ, патник во автобусот.
Од „Чазматранс“ го потврдија инцидентот и рекоа дека ова не им е прв ваков случај.
„Можеме да потврдиме дека тоа се случи. Момчето влегло под автобусот во Белград, се фатило со рацете и нозете за осовината што ги спојува задните тркала и така се држело неверојатни пет часа. Ова не ни е прв ваков случај, нешто слично ни се случи неодамна на линијата меѓу Подгорица и Дубровник“, рече Дражен Павловиќ од управата на „Чазматранс“.