Деветти пат сруши рекорд, па позираше како турскиот олимписки пиштолџија

Неверојатниот Швеѓанец Арман Диплантис синоќа во Париз го собори светскиот рекорд во скок со стап по деветти пат во кариерата и со тоа стигна до златниот медал на Олимписките игри.

Диплантис ја прескокна шипката на нереална висина од 6,25 метри и повторно се надмина себеси, соборувајќи го светскиот рекорд по деветти пат на само 24 години.

Диплантис синоќа не само што ја воодушеви публиката со својот скок, туку и со прославата на новиот рекорд бидејќи реши да го имитира Јусуф Дикеч, човекот кој стана вистинска сензација на летните Олимписки игри.

Дикеч се натпреваруваше во гаѓање со воздушен пиштол на десет метри, каде заедно со Шевала Тархан ѝ донесе сребрен медал на Турција откако загубија од Србија во одлично финале.

Дикеч ги освои симпатиите на навивачите бидејќи пукаше без дополнителна опрема, освен чепчиња за уши, а другата рака ја држеше во џеб додека ја погодуваше целта.

По синоќешниот скок, Диплантис застана и го имитираше ставот на Дикеч, а фотографиите веќе станаа хит на социјалните мрежи.

Инаку, Американецот Сем Кендрикс синоќа го освои среброто со скок од 5,95 метри, а Емануил Каралис со бронза со скок од 5,90 метри.

Диплантис првпат го собори светскиот рекорд во февруари 2020 година, кога ја прескокна шипката на височина од 6,17 метри и оттогаш седум пати по ред се подобруваше за еден сантиметар.