Јавното обвинителство во Италија започна истрага поради смртта на 10-годишно девојче, кое учествувало во т.н. „игра на задушување“ на социјалната мрежа TikTok.
Неколку часа откако се дознало за смртта на девојчето, што предизвика гнев низ целата земја, Бирото за заштита на податоци во Рим одлучи TikTok, доколку не може со сигурност да ја провери возраста на корисниците, да биде блокиран најдоцна до 15 февруари.
Иако според правилата на TikTok корисниците не можат да бидат помлади од 13 години, компанијата не го спречила девојчето од 10 години да креира свој профил, соопштија италијанските власти.
Девојчето од Палермо се заклучило во тоалетот и снимало со телефонот додека појасот од бањарката го стегало околу вратот, учествувајќи во предизвикот на TikTok, чија цел било колку е можно подолго да се издржи без воздух. Нејзината петгодишна сестра ја пронашла во бесвесна состојба. Докторите се бореле за нејзиниот живот, но не успеале да ја спасат.
Јавното обвинителство во Палермо покрена истрага поради поттикнување самоубиство.
Италијанските власти наведуваат дека на платформата TikTok ѝ „недостасува доволно внимание за заштита на малолетниците“ и го осудија лесниот пристап преку кој децата можат да се пријават на апликацијата.
Платформата за споделување видео содржини е во сопственост на кинеската компанија ByteDance и е многу популарна меѓу тинејџерите во светот. Во Европа има околу 100 милиони корисници.
„Безбедноста на TikTok заедницата е наш главен приоритет. Подготвени сме во секој момент да соработуваме со властите во врска со истрагата за смртта на девојчето“, соопшти TikTok.