Легендата на Лацио и контроверзен поранешен напаѓач ги нападна Меси и Нејмар по елиминацијата од ПСЖ од Лигата на шампионите, а упати пофални зборови за Роналдо.
Лионел Меси и Нејмар добија свирежи на вчерашниот натпревар на нивниот ПСЖ против Бордо, а поради елиминацијата на тимот од Реал Мадрид во осминафиналето од Лигата на шампиони. Тоа беше прв пат Меси да биде свиркан од сопствените навивачи.
Паоло Ди Канио даде свое мислење за Меси говорејќи за Sky Sport Italia, а го спореди и со Кристијано Роналдо.
„Меси го напушти теренот чешајќи се за главата. Тој нема никакви емоции“.
„Го претпочитам Кристијано Роналдо. Сакате да ви седам на клупа против Манчестер Сити? Ќе си отидам во Португалија, ќе се вратам и ќе дадам хет-трик. Претпочитам човек кој има душа, отколку вонземјанин без емоции“, вели Ди Канио алудирајќи на саботниот хет-трик против Тотенхем постигнат откако не играше на градското дерби против Манчестер Сити наводно дека имал повреда, а гласините велат дека одбил да биде резерва.
„Меси ги покажа своите ограничувања на личноста. Се разбира дека ќе му свиркаат. Имаше илјадници фанови кои го чекаа, сонуваа, но неговото однесување беше погрешно“.
„Нејмар беше уште полош. Не игра во најдобро издание, а минатиот месец рече дека сака да игра во МЛС за да имал три месеци одмор. Мислам, имај почит, сигурно ќе си имаш проблеми“.