ПСЖ синоќа конечно прослави пласман во финале на Лигата на шампиони, а играчите и тренерот, нормално, се и тоа како задоволни од таквиот историски успех.
Анхел Ди Марија синоќа беше главен играч на ПСЖ кога станува збор за головите. Ги намести првиот и третиот, а го постигна вториот.
„Пресреќен сум. Целта ни беше да стигнеме до финалето и да останеме тука во Португалија што е можно подолго. Едноставно е неверојатно. Сега ќе прославиме малку. Навистина одигравме добро, заслуживме да победиме и се надеваме дека ќе продолжиме на истиот начин“, вели Ди Марија.
Нормално, за одличната изведба на францускиот шампион заслужен е и германскиот стратег Томас Тухел чија тактика тотално го исфрли од игра Лајпциг.
„Покажавме карактер, одлучност и глад за победа. Имавме сѐ: ментална силина, желба за одбрана и заеднички да патиме. Беше тоа одлична партија од страна на целиот тим. Одлично одигравме тимски и заслуживме да победиме“, рече Тухел.
