Во вонредни услови што го затекнаа целиот свет, новата, 21. сезона на Моден викенд Скопје се одржува дигитално.
Најголемата модна платформа во нашата земја храбро ги поднесе ударите на новонастанатата ситуација и се прилагоди на новото време, со цел да остане простор и медиум преку кој дизајнерите ќе го покажат трудот вложен во новите колекции, а МВСК ќе го одржи континуитетот кој ни е повеќе од потребен во овие мигови кога во сите сфери на живеењето се придвижуваме кон „новото нормално“.
Овие колекции ексклузивно ќе бидат презентирани на социјалните мрежи, со премиера на снимените видеа и фотографии во партнерство со Skopje City Mall, а тука ќе ги читате критичките видувања за нив, низ призмата на модната блогерка и заменик-уредник на Kajgana.com, Александра Спасеска.
Серијалот го почнуваме со македонската дизајнерка со љубљанска адреса Евгенија Зафировска, која останува верна и доследна на етичко-еколошкиот и одржлив пристап кон изработката.
Во нејзината најнова колекција White Stone таа повторно се води од строгоста и структуралноста на архитектонските форми, но овојпат во една понежна и посуптилна естетика. За тоа придонесува палетата на (претежно) светли бои – инспирирана од белиот брачки камен од кој е изградена Диоклецијановата палата - кои им даваат свежина и мекост на креациите надополнети со за неа препознатливите рачни доработки и секако – елементи од рециклирани материјали.
Токму овој контрапункт на строгото и сензуалното ја покажува еволуцијата во изразот на Зафировска, а таа безвременска игра на текстури и тоа неотуѓиво чувство на традиција во модерна форма ја прават дизајнер со изграден печат кој храбро чекори кон иднината на модата, која е одржлива, етичка и неприкосновено оригинална.
Шминка: Farmasi и Марија Лазарова
Фризура: Revlon Professional
Фотографија: Света Богова Јовановска
Кастинг: Виктор Цветановски
Модели: Aна Ежова, Кони Маркова, Пале Манева, Ивана Гелева @ Podium Model Agency
Во соработка со: Skopje City Mall
Поддржано од: Lenor
Дигитален партнер: A1 Македонија