Скопје, 15 јули 2020 (МИА) – До 20:45 часот вечерва, на гласање на денешните предвремени парламентарни избори излегле 922.678 граѓани со право на глас.
Тоа значи дека одзивот е 50,86 проценти, објави вечерва Државната изборна комисија. Обработени се податоци од 3.466 од вкупно 3.480 гласачки места.
Според податоците што ги објави на прес-конференција претседателот на ДИК Оливер Деркоски, најголема излезност има во Четвртата изборна единица – 59,79 проценти, а најмала и понатаму останува Шестата изборна единица со 39,23 проценти.
Во Првата изборна единица излезноста е 52,17, во Втората е 47,97 проценти, во Третата 57,31 и во Петтата 50,16 проценти.
Претседателот на Државната изборна комисија Оливер Деркоски вечерва на прес-конференција оцени дека изборниот ден помина одлично, со мали исклучоци.
-Денешниот изборен ден помина во исклучително сложена ситуација во земјава, но помина одлично со мали исклучоци кои во текот на денот заедно со вас ги расправавме. Можам само да им честитам на граѓаните за изразениот демократски капацитет што го покажаа во овој изборен ден, рече Деркоски.
По првпат годинава поради пандемијата гласањето е продолжено за два часа од вообичаеното, односно се гласаше до 21 часот.
Следната прес-конференција е најавена за после 22 часот, кога ДИК ќе има повеќе информации.