Уште од 15 ноември почна да важи обврската за задолжително поседување зимска опрема во возилата, која ќе трае сѐ до 15 март наредната година.
Согласно член 361 став (1) од Законот за безбедност на сообраќајот на патиштата моторните возила и мобилните машини кога учествуваат во сообраќај на пат, во периодот од 15 ноември до 15 март задолжително треба да поседуваат пропишана зимска опрема, согласно одредбите утврдени во Правилникот за задолжителна опрема на возилото, велосипедот и запрежно возило за безбедно учество во сообраќајот на патиштата, како и на трактори за безбедно извршување на земјоделски односно шумски работи.
На прагот на зимата повторно се отвора дилемата – класични зимски или универзални гуми?
Сезоната на менување гуми веќе е во тек, па освен што треба да се одлучи која марка и модел да се набават, сѐ почесто се појавува и прашањето дали да се одлучите за зимски или универзални (all season) гуми.
Од друга страна, во услови на чест снег, мраз и при многу ниски температури, секогаш е најдобро решение да имате зимски гуми.
Составот на овие гуми овозможува максимално управување и го намалува ризикот од лизгање, додека длабочината на шарата обезбедува добра „прилепеност“ со патот, но исто така спречува задржување на снегот во внатрешноста на гумата.
Универзалните пневматици, како компромис помеѓу летните и зимските, можат да бидат добра алтернатива за зимските гуми во умерените региони, каде што нема големи температурни флуктуации, односно каде што летото не е премногу топло, а зимите се благи и дождливи.
Овие гуми се погодни за возење во места и градови каде снежните врнежи не се честа појава, но дури и кога се случуваат, улиците редовно и навремено се чистат од снег.
Исто така, универзалната гума може да биде добар избор за возачи кои поминуваат мал или ограничен број километри годишно.
При избор на гуми, без разлика дали се зимски или универзални, важно е да се напомене дека не се сите исти и дека симболите на страничните ѕидови исто така укажуаат на квалитетот и намената.
Вистинските зимски гуми може да ги препознаете не само по ознаката M+S, што значи дека се наменети за возење по кал (mud) и снег (snow), туку особено според симболот на три планински врвови со снегулки, што значи дека гумите се изработени според прописите на UNECE (Економска комисија за Европа при ООН).
Универзалните гуми ги имаат истите симболи и ознаки како и зимските, затоа тие се алтернатива и добар избор за оние кои возат на кратки растојанија, избегнуваат да возат на снег и живеат на места со блага клима.
