Динамо и Црвена звезда со полни каси го завршија учеството во ЛШ

Регионалните великани Динамо Загреб и Црвена звезда со полни каси го завршија учеството во Лигата на шампионите.

Динамо е најголемиот губитник оваа сезона. „Модрите“ го победија Милан во последното коло (2:1), освоија 11 поени, но завршија на 25-тото место. Гол разликата го елиминира Динамо од Лигата на шампионите. По 11 поени освоија и Манчестер Сити, Спортинг и Клуб Бриж.

Црвена звезда немаше никакви шанси за пласман во плеј-офот, но дополнително заработи со победата во Берн над Јанг Бојс (0:1).

Од учеството во Лигата на шампионите Динамо заработи речиси 40 милиони евра, а Црвена звезда приходуваше 32 милиона евра.

Најмногу пари во прелиминарната фаза собра Ливерпул. Поразот во Ајндховен го спречи да ја пробие магичната граница од 100 милиони евра. Освен „Црвените“, само уште еден клуб ја надмина границата од 90 милиони евра, а тоа е Интер, додека блиску се Арсенал, Барселона, па дури и Атлетико.

Вреди да се потсетиме дека УЕФА одлучи да ги награди осумте првопласирани. Клубовите кои изборија место во осминафиналето добија по 11 милиони евра. Истата сума ќе ја добијат и победниците од плеј-офот за место во топ 16.

Подоцна, кој ќе стигне до четвртфиналето ќе добие 12.500.000 евра, полуфиналистите уште 15.000.000, финалистите дополнителни 18.500.000, а победникот во Лигата на шампионите, во мај оваа година на „Алианц Арена“ во Минхен, ќе добие уште 10.000.000. од кои 6.500.000 за освојување на пехарот, а останатите 4.000.000, бидејќи автоматски ќе учествуваат во борбата за трофејот во Суперкупот на УЕФА.