Огромно изненадување на отворањето на новата сезона од Лигата на шампионите откако вечерва во Загреб Динамо успеа да го победи големиот Челси.
Хрватскиот шампион после три години пауза се врати во групната фаза и веднаш на стартот ги освои симпатиите. Борбената игра, но и одличната одбрана му донесоа на Динамо важни 3 бода против фаворитот за пласман во нокаут-фазата.
Македонските репрезентативци Аријан Адеми и Стефан Ристовски се најдоа во почетните 11, а и двајцата имаа добри шанси за гол. Адеми во првиот дел се обиде со удар малку надвор од шестнаесетникот, но Кепа Арисабалага одбрани. Ристовски по паузата упати одличен удар од околу 25 метри, баскискиот голман доволно ја зафати топката за таа со помош на пречката да не заврши во мрежата.
Сето тоа се случуваше по 13-тата минута кога одличната брза контра на домашните ја искористи Мислав Оршиќ кој итро го совлада Арисабалага. Голот се покажа како решавачки бидејќи Челси до крај не успеа да израмни откако „Модрите“ или одлично се бранеа, или Доминик Ливаковиќ со интервенции спасуваше израмнување.
Ристовски ги одигра сите 90 минути, додека Адеми беше заменет во 88. минута. По крајот Адеми беше прогласен за играч на натпреварот.
Во оваа група се уште и Салцбург и Милан кои својот натпревар го играат вечерва.
Во другиот натпревар кој се играше во истиот термин од 18:45 часот, Борусија ги запиша првите 3 бода откако во Дортмунд лесно го совлада Копенхаген со 3:0 со головите на Марко Ројс (35.), Рафаел Герејру (42.) и Џад Белингам (83.).