Поради закана за поставена бомба и утрово наставата е прекината во девет скопски средни училишта. Прв пат дојава за бомба доби и Народната банка. Учениците се евакуирани, а на терен е единицата за антитероризам на МВР.
Во СВР Скопје утрово околу 9:45 часот било пријавено дека на електронска адреса на девет средни училишта во Скопје е упатена закана за поставена експлозивна нaправа.
„Веднаш по добиената пријава, од полициски службеници се преземени мерки за безбедно евакуирање на училиштата и во тек се антитерористички проверки и се преземаат мерки за расчистување на случаите“, информираа од МВР.
И од НБРСМ исто така, утринава околу 10:10 часот било пријавено дека на електронска адреса е упатена закана за поставена експлозивна направа.
Ова е прва закана кон институција која не е образовна, односно во изминатите неколку недели постојано има пријави за поставени бомби во основни и средни училишта.
Од МВР нагласуваат дека веднаш се преземени неопходните мерки за безбедно евакуирање и во тек се антитерористички проверки и се преземаат мерки за расчистување на случајот.