По седум сезони, Док Риверс е отпуштен и повеќе не е тренер на Лос Анџелес Клиперс, пренесуваат американските медиуми. Риверс работеше со тимот од 2013 година.
Под водство на Американецот, Клиперс никогаш не стигнаа до финалето на Западната конференција.
Оваа сезона ЛА Клиперс беа елиминирани во конференциското полуфинале од НБА плејофот од страна на Денвер Нагетс и покрај водството од 3-1 што го имаа по четвртиот меч.
Подоцна загубија три последователни средби и серијата ја завршија со 3-4.
„Им благодарам на Клиперс што ми овозможија да им бидам тренер и им благодарам за целата поддршка што ми ја дадоа. Кога ја презедов екипата за цел имав да направам победнички состав, дестинација во која секој слободен играч ќе сака да дојде за да ја освоиме шампионската титула. Успеав да исполнам многу цели, додека некои други ги изгубив од вид, па сум многу разочаран што тоа се случи, кога знаете дека вашиот тим има можност да биде шампион и вака да заврши, не е лесно. Им благодарам на сите тренери, играчи и останати кои беа дел од тимот додека бев тренер. Најмногу сум им благодарен на навивачите, минавме заедно низ многу работи и благодарен сум што бевме дел од истиот тим“, изјави Док Риверс.