Долгоочекуваната документарна серија на Netflix, за принцот Хари и Меган Маркл, веќе предизвика контроверзии бидејќи британските медиуми ги критикуваат и двата објавени трејлера, тврдејќи дека станува збор за злоупотребени снимки и фотографии.
Двата трејлери за новиот документарец на Netflix беа критикувани поради погрешен начин на користење на снимки и на фотографии.
На трејлерите се прикажани архивски видеа и фотографии додека принцот Хари и Меган зборуваат дека се ставени настрана од кралското семејство и дека се прогонувани од медиумите.
Посочено е дека најмалку три фотографии се направени од настани кои немаат врска со парот.
Британскиот кралски дописник Џени Бонд остро ги критикуваше „исклучително невештите продукциски вредности“ на документарецот за Хари и Меган, додека истакнатата новинарка Лорејн Кели ја опиша употребата на одредени фотографии и снимки како „бизарни“.
Дури и BBC објави детална анализа на моменти кои ја „мамат“ јавноста.
Друг клип, користен кога Хари зборува за „болката и страдањето на жените“ кои се венчаат во кралското семејство, покажа снимка од манекенката Кејти Прајс како пристигнува на суд во Лондон минатиот декември.
Третиот, кој се користи за да се илустрира медиумско бркање, покажува снимка од поранешниот адвокат на Доналд Трамп, Мајкл Коен, како го бркаат папараците.
Една фотографија ги прикажува Хари и Меган фотографирани одозгора, додека Хари зборува за протекување информации во јавноста.
Кралскиот уредник на Evening Standard, Роберт Џобсон, ги негираше обвинувањата и тврди дека фотографијата е направена со нивна дозвола од акредитиран фотограф.
