Супер комбинација на крцкава тортиља и полнење што се тегне. Кесадиљата со пире од компири и сланина ќе ви се допадне уште по првиот залак.
Кесадиља (quesadilla) е мексиканско јадење кое се прави од тортиља од пченка и се полни со кашкавал. Овој специјалитет стана популарен во целиот свет, па денес постојат милион различни рецепти за полнење. Можете да користите речиси секоја храна, а наш предлог е да го пробате овој фил од пире, сланина, пченка и грашок и сето тоа збогатете го со кашкавал кое се растегнува кога ќе се растопи.
Јадењето кесадиља настанало во периодот на колонијално Мексико, а самото име е деминутив од зборот quesada (кесада), што значи вид на чизкејк. Доаѓа од queso (кесо - сирење), што пак произлегува од латинскиот caeseus.
Потребни состојки:
- 2 компира
- 50 гр пармезан
- ½ лажичка бибер
- 1 кромид
- ½ лажица путер
- 4 дебели парчиња сланина
- 3 лажици пченка
- 3 лажици зелен грашок
- 6 тортиљи
- сос од домати
- тврд кашкавал
Подготовка:
Компирите излупете ги и исечете ги, па ставете ги да се варат. За тоа време во тавче растопете го путерот, потоа додадете го исечканиот кромид, а кога ќе омекне додадете ја сечканата сланина. По неколку минути додадете пченка и грашок. Пржете уште 2-3 минути. Изгмечете ги компирите, па додадете им бибер и пармезан. Добро соединете. Во пирето додадете зеленчук со сланина и измешајте. Намачкајте ја тортиљата со сос од домати, посипете со рендано сирење, па на половина од тортиљата ставете од филот и повторно посипете со сирење. Свиткајте и пржете од двете страни во тава во која сте загреале малку масло.