Милано, 15 април 2018 (МИА) - Тимот на Милан го запре Наполи на патот кон титулата, откако двата тима одиграа 0:0 пред над 60.000 гледачи на „Сан Сиро,“ во натпревар од 32-то коло на Серија А.
Дуелот беше рамноправен, при што и двете екипи имаа свои шанси, но херој на мечот сепак беше Џанлуиџи Донарума, кој со феноменална одбрана во 92-та минута го одбарни својот гол, откако Аркадиуш Милик шутираше одблизу.
Пред тоа, еден од најталентираните голмани во светот влезе во историјата на Калчото како најмлад фудбалер во историјата со одиграни 100 натпревари во Серија А. Тој го подобри рекордот на Антонио Касано, кој беше две години постар кога го играше својот 100-ти меч. Поранешниот напаѓач го стори тоа на 21 година и 71 ден, а популарниот Џиџи го оствари рекордот на 19 години и 49 дена.
На „Сан Сиро“ на домаќините им требаше од победа за да ги задржат минималните шанси да се пласираат во Лигата на шампионите, додека гостите сакаа триумф за да останат во борбата за титулата со Јувентус.
Јуве вечерва игра дома со Сампдорија и со евентуална победа може да му побегне на тимот од Неапол со шест бода на врвот на табелата, на 7 кола пред крајот на Првенството.