Словенија имаше почеток од соништата откако предводена од чудесниот Дончиќ ја среди Аргентина со 18 поени разлика.
На паркетот во „Саитама Супер“ арената во Токио убедливо најдобар беше Лука Дончиќ кој го наполни аргентинскиот кош постигнувајќи 48 поени, а зашиша и 11 скока.
Аргентина помириса водство само во првите неколку напади кога поведе со 5:3, а потоа Словенците ја презедоа контролата и првата четвртина ја завршија со водство од 32:24. Во втората четвртина само го зголемуваа водството, дојдоа и до +22, за на полувреме да заминат со 62:42. Најголемата разлика Словенците ја направија во третата четвртина кога за момент на семафорот стоеше 82:52 (+30 разлика), за до крајот Аегентинците да се изборат за подостоинствен пораз од 18 поени разлика и конечни 118:100.
Покрај Дончиќ солидна претстава на јапонскиот паркет прикажа и Клемен Препелич кој беше втор најефикасен со 22 поена. Дабл-дабл освен Дончиќ оствари и натурализираниот Словенец Мајк Тоби со 11 поени и 14 скокови. Во поразениот табор најефикасен беше 41-годишниот Луис Скола кој уфрли 21 поен.
Ова беше прв натпревар во оваа Ц група, а вториот се игра од 14 часот кога домаќинот Јапонија ќе се сретне со Шпанија.
Синоќа на првиот ден од кошаркарскиот турнир Франција го приреди најголемото изненадување откако со 83:76 го совлада Дрим Тимот на САД.
