И покрај одличниот настап на Лука Дончиќ, Далас Маверикс го загубија третиот натпревар во низа. Атланта Хокс ги победи со 130:122.
Дончиќ беше одличен, не спектакуларен, а главно треба да биде спектакуларен за Далас да победи оваа сезона. Тој синоќа постигна 30 поени, собра четири скока и осум асистенции.
Дончиќ по натпреварот се пожали дека го боли скочниот зглоб и дека не е во најдобра физичка кондиција, што е нормално бидејќи е средина на сезоната. Но, неколку часа пред натпреварот, новинарот на ESPN Тим Мекмахон напиша дека Дончиќ ѝ дал ултиматум на управата на Далас да му донесе засилување до крајот на преодниот рок (9 февруари).
Словенечкиот кошаркар по натпреварот ги демантираше тие тврдења, исто како и сопственикот на Далас, Марк Кубан. Дончиќ беше прашан од новинарите за неговиот однос со раководството на клубот на чело со Ник Харисон и тренерот Џејсон Кид.
„Секогаш се на моја страна. Не им сугерирав никакво засилување. Зборуваме дури и премногу, имаме одлична комуникација“, изјави Дончиќ по мечот.
Далас е на петтото место во Западната конференција со скор 24-22.
