Сјајна партија одигра Лука Дончиќ кој го предводеше Далас до тесна победа над Атланта, додека Лејкерс трет пат по ред играа продолженија за да дојдат до победата.
Словенечкото чудо уфрли 28 поени и со по 10 скокови и исто толку асистенции прослави нов трипл-дабл и беше најдобар поединец на натпреварот на кој најефикасен беше гостинскиот кошаркар Џон Колинс со 33 поени.
Далас врза три победи во серија, но и натаму има негативен скор од 12-14 и се наоѓа надвор од плеј-оф зоната на Западот, односно на 11. место.
Шампионот Лејкерс се мачеше со Оклахома победувајќи ја дури по продолженија. Леброн Џејмс постигна 25 поени со 6 скокови и 7 асистенции, а ист број на поени запиша и Доминиканецот Ал Хорфорд од редовите на гостите. Дабл-дабл учинок оствари Хамиду Дјало од Оклахома.
Интересно, ова е трет натпревар во низа на кој Лос Анџелес победува по продолженија. Со скор од 20-6 Лејкерс сѐ уште се втори за Западот зад лидерот Јута.
Резултати:
Вашингтон Визардс - Торонто Репторс 115:137
Далас Маверикс - Атланта Хокс 118:117
Бруклин Нетс - Индијана Пејсерс 104:94
Мемфис Гризлис - Шарлот Хорнетс 130:114
Минесота Тимбервулвс - Лос Анџелес Клиперс 112:119
Чикаго Булс - Њу Орлеанс Пеликанс 129:116
Денвер Нагетс - Кливленд Кавалирс 133:95
Лос Анџелес Лејкерс - Оклахома Сити Тандер 114:113 прод.
Феникс Санс - Милвоки Бакс 125:124