Словенците синоќа остварија важна победа против Французите, а Лука Дончиќ испиша историја на европските првенства.
Кошаркарите на Словенија ја победија француската репрезентација со 88:82 во натпреварот од последното петто коло од групата Б и од првата позиција обезбедија пласман во осминафиналето.
Воедно, нивниот најдобар играч Лука Дончиќ дојде на второто место на вечната листа по број на постигнати поени на еден натпревар во историјата на европските првенства.
Дончиќ постигна 47 поени против Французите и за еден поен го надмина легендарниот грчки кошаркар Никос Галис, кој против Швеѓаните во 1983 година постигна 46 поени.
На првото место е поранешниот белгиски кошаркар Еди Терас, кој во далечната 1957 година постигна дури 63 поени во победата на Белгија над Албанија од 90:48.
