Судењето меѓу Амбер Херд и Џони Деп доби епилог. Славниот актер го доби судскиот спор за клевета против бившата сопруга Амбер Херд и ќе добие оштета од 15 милиони долари.
Поротата утврди дека Амбер Херд е виновна за клевета во статија објавена во Washington Post во 2018 година. Џони Деп ќе добие отштета од 10 милиони долари и 5 милиони долари надомест.
Поротата, чиј идентитет не беше откриен една година, била сочинета од пет мажи и две жени на возраст од 20 до 60 години.
Џони Деп не беше присутен во моментот на читањето на пресудата бидејќи минатата недела отпатува во Обединетото Кралство за да настапи на концерт.
По пресудата, Амбер Херд објави изјава на Instagram:
„Невозможно е да го објаснам разочарувањето кое го чувствувам денес. Скршена сум што толку многу докази не беа доволни за да се спротивстават на неразмерната моќ и влијанието на мојот поранешен сопруг. Тоа е назадување. Го враќа часовникот наназад во време кога жената која прозборувала била јавно засрамувана и понижувана. Тоа ја отфрла идејата дека насилството над жените треба да се сфати сериозно“, порача актерката.
Поротата исто така утврди дека и Џони Деп ја клеветел Херд, таа доби два милиони долари како компензација, но не доби казнен надомест.
