Џони Деп и Пенелопе Круз повторно ќе работат заедно – ангажирани се во акциониот трилер Day Drinker.
Режисер на филмот е Марк Веб, во продукција на Lionsgate.
Врз основа на сценариото на Зак Дин, Day Drinker следи шанкер на брод за крстарење кој запознава мистериозен гостин кој пие преку ден, само за двајцата да завршат заплеткани во криминалното подземје и да се поврзат на неочекувани начини, пренесува Variety.
Сè уште не се познати имињата на ликовите кои Деп и Круз ќе ги отелотворат во играниот филм, како и кога филмот треба да почне да се прикажува во кината. Засега не се познати повеќе детали за филмот.
Ова ќе биде четврти филм на кој актерите соработувале досега. Заедно играа во филмовите Blow од 2001 година, Pirates of the Caribbean: On Stranger Tides од 2011 година и Murder on the Orient Express од 2017 година.
Овој акциски трилер го означува враќањето на Џони Деп во Холивуд по правната битка со поранешната сопруга Амбер Херд.
Поради наводите на Херд, Деп беше принуден да ја напушти франшизата Fantastic Beasts, а по судењето, тој го имаше своето прво појавување во филмот Jeanne du Barry од 2023 година. Тој го режираше и филмот Modi: Three Days on the Wing of Madness, кој беше премиерно прикажан на овогодинешниот Меѓународен филмски фестивал во Сан Себастијан, пишува Variety.
