Холивудскиот актер Џони Деп вчера сведочеше пред судот во Вирџинија во случајот за клевета против неговата поранешна сопруга Амбер Херд, која го обвини за семејно насилство.
Во своето тричасовно сведочење, кое ќе продолжи денеска, ѕвездата зборуваше за обвинувањата од Херд и својата историја на злоупотреба на дрога.
„Мојата цел е вистината“, рече Деп на почетокот на своето сведочење.
Тој ја тужи поранешната сопруга Херд за 50 милиони долари поради текстот објавен во The Washington Post од 2018 година во кој таа пишуваше за нејзиното искуство со семејно насилство. Деп не се споменува по име во овој текст, но претходните настани укажаа за кого станува збор.
Деп тврди дека текстот на Херд довел до финансиски загуби за него, вклучително и исклучување од идните филмови „Пиратите од Карибите“ откако тој ја водеше франшизата 15 години.
„Еден ден си Пепелашка, така да се каже, а потоа за секунда си Квазимодо“, рече Деп за тоа како неговата кариера се сврте наопаку откако беше обвинет за злоупотреба.
„Јас не го заслужив тоа, ниту моите деца, ниту луѓето кои веруваа во мене сите овие години“, рече Деп.
Во своето сведочење Деп призна дека тој и Херд се карале за време на врската, но рече: „Никогаш не сум дошол до точка да ја удрам госпоѓа Херд на кој било начин, ниту пак сум удрил некоја жена во животот“.
Тој исто така го опиша турбулентниот однос на неговите родители и вербалното и физичкото малтретирање што тој и неговите браќа и сестри го доживеале од нивната мајка. Тој изјави дека неговото прво искуство со земање контролирани супстанции се случило кога имал приближно 11 години и дека ги земал таблетите на мајка му на рецепт „за да избега од хаотичната природа на нивниот живот“.
Судењето започна минатата недела, а ова е прва можност за Деп да проговори за случајот во целост и јавно.