Британскиот премиер Борис Џонсон изјави дека стравот од тоа никогаш да не го види новородениот син му даде сила да го победи коронавирусот.
„Едноставно одбив да мислам на тоа“, изјави Џонсон, објаснувајќи дека додека лежел поврзан на машини се фокусирал само на позитивни мисли за свршеницата Кери Симондс, детето кое го очекуваа, како и на остатокот од семејството.
Запрашан дали се уплашил дека никогаш нема да си го види синот, кој во меѓувреме се роди, Џонсон искрено одговори дека бил.
„Имаме уште многу причини за живот, многу работи да направиме и нема да кријам од вас, размислував и за тоа“, рече британскиот премиер.
Три недели откако се избори со инфекцијата Џонсон сведочеше на раѓањето на синот Вилфред Лори Николас. Името Николас е во чест на двајцата доктори Николас Харт и Николас Прајс, кои му го спасија животот додека беше на интензивна нега.