Новата изложба на италијанскиот фотограф Паоло Роверси доаѓа со изненадување за сите фанови на Ријана. Фотографиите кои досега беа необјавени може да се видат врамени во галеријата Palazzo Reale во Милано.
Фотографиите биле направени додека пејачката работела на нејзиниот албум „Anti“.
Ријана се запознала со Роверси во 2014 година, кога тој ја фотографирал пејачката за насловната страница на i-D магазинот. Роверси го користел истиот 8х10 формат на камера со кој работи веќе 20 години, а токму во неговата работилница во Париз, за време на фото-сесијата, започнало нивното пријателство.
„Таа е фантастична, вистински уметник. Работевме во моето студио два дена. Нејзиното присуство е неверојатно: начинот на кој се движи, самодовербата, контролата над телото, енергијата, сензуалноста. Таа е целосно свесна за моќта на нејзината убавина. Таа е уметник, на истиот начин на кој добрите модели се уметници, не е само уште едно убаво лице“, изјави Паоло Роверси во интервју за Vogue.
Паоло Роверси стана познат по работата со супермодели како Наоми Кембел и Кејт Мос.
„За мене, модната фотографија е секогаш портрет. Всушност, таа е двоен портрет на жената и на облеката. Тоа е вистинската дефиниција: Двоен портрет“, рече Роверси неодамна.
Работејќи со Ријана, тој ги правеше фото-сесиите за нејзиниот албум „Anti“, креирајќи фантастични парчиња уметност за нејзините хитови „Bitch Better Have My Money“, „Kiss Me Better“ и „Needed Me“.
Фотографиите на Паоло Роверси на кои позира Ријана се дел од изложбата на Vogue и ќе бидат изложени во галеријата Palazzo Reale до 17 декември.