Џошуа нокаутиран како никогаш досега, Дубоа го уништи во борбата за светската титула

Британскиот боксер Ентони Џошуа беше тешко нокаутиран на синоќешниот боксерски спектакл на лондонскиот „Вембли“, а пред 96.000 гледачи беше поразен од сонародникот Даниел Дубоа.

Дубоа го нокаутираше Џошуа во петтата рунда со разорно десно кроше кое го погоди во брадата, по што Џошуа падна како покосен и не можеше да застане на нозе.

Судијата го прекина мечот, а со овој брутален нокаут Дубоа стана светски првак на ИБФ во тешка категорија.

Дубоа се наметна како подобар борач уште од самиот почеток на борбата, а на крајот од првата рунда го испрати Џошуа на подот и ја доби рундата со нокдаун. Џошуа беше спасен од ѕвончето кое означи крај додека судијата одбројуваше.

Џошуа со многу мака ги преживеа нападите на Дубоа во втората рунда, во која успеа да го заземе центарот на рингот и да го наметне својот ритам само во последните 30 секунди.

Дубоа продолжи да го декласира Џошуа во третата рунда, во која Џошуа повторно беше спасен од ѕвончето, четвртата рунда исто така му припадна на Дубоа, а во петтата рунда се случи последниот нокаут, по што немаше враќање за Џошуа.

За Џошуа ова е прв пораз со класичен нокаут во кариерата, а сега има биланс од 28 победи и 4 порази. Дубоа има скор од 22-2.