Пилотот на Дукати денес е пуштен од болница каде заврши по страшниот судир со Фабио Куартараро на синоќешната трка за Големата награда на Велика Британија.
Андреа Довициозо налета на паднатиот мотоцикл на Французинот Куартараро по што летна во воздух, а повредите од падот го испратија во болница. Сепак, освен моменталната загуба на помнењето, Дови нема сериозни повреди и денес беше пуштен да си оди дома.
„Дови се чувствува добро и веќе е дома, но не може да се сети добро што се случи“, изјави Давиде Тардоци, тим-менаџер на Дукати.
„Првата кривина беше навистина тешка. Ринс стартуваше одлично, беше многу агресивен. Штом дојде моментот да се наведнам, загубив рамнотежа и паднав, а Довициозо налета на мојот мотоцикл. Добро е што и двајцата сме во ред и се надевам дека и тој брзо ќе закрепне“, рече Куартараро, виновникот за инцидентот.
Трката во Силверстоун ја одбележаа Шпанците кои го освоија подиумот: победи Алекс Ринс, втор заврши Марк Маркес, а трет беше Маверик Вињалес.
