Врнежите од дожд и снег кои паѓаат изминатите десетина дена, а особено во последните 48 часа, ги зголемија водостоите на водотеците и суводолиците во земјава.
Најголеми покачувања на водостоите има во источните и јужните делови од државата, а излевања на реките се забележани во сливовите на реките Брегалница, Струмица и Крива Река.
За 121 сантиметар утринава е повисок водостојот на реката Пчиња кај Катланово, а за 60 сантиметри на Вардар кај Демир Капија, покажуваат денешните мерења на Управата за хидрометеоролошки работи.
За 20 сантиметри е повисоко нивото на реката Струмица кај Ново Село, за 16 сантиметри на Црна Река кај Новаци и за 12 сантиметри повисок е водостојот на Брегалница кај Штип.
Кај езерата, водостојот на Преспанско Езеро е шест сантиметри под апсолутниот минимум.
– Во моментов бележиме намалување на водостоите од горните сливни подрачја, и
се уште високи водостои во долните сливни подрачја и тоа кај реките Пчиња, Брегалница,
Струмица, Црна и Боротинска Река, велат од УХМР.
Оттаму препорачуваат внимателно движење покрај реките и суводолиците поради појава на свлечишта.
