Иако во последните неколку години имаше неколку ситуации со самозапалување на Lamborghini, сега за пожарот постои друг виновник.
Lamborghini Huracan Performante се запали на една бензинска пумпа во САД, додека неговиот сопственик плаќаше гориво.
Случајните минувачи кои забележаа како возилото наеднаш почнува да гори, веројатно помислија дека станува збор за самозапалување - што само по себе не би било необично за едно Lamborghini, со оглед на тоа дека такви ситуации веќе се забележани ширум светот.
Меѓутоа, видео кое го сними еден љубител на суперспортски автомобили, ја открива вистината.
Имено, сопственикот на автомобилот, кој ставаше гориво покрај паркираниот Huracan, заборави да го извади цревото од резервоарот на своето возило, во моментот кога се упати да ја плати сметката.
Цревото се откина од апаратот и го испрска со бензин задниот дел од автомобилот, каде се наоѓа моторот, кој веќе бил загреан од возењето, па набргу изби пожар.
Пожарникарите, кои набргу стигнаа, успеаја да го угасат пожарот и да спречат поголема трагедија, но за синото Lamborghini веќе беше прекасно - автомобилот целосно изгоре. За среќа, во пожарот немаше повредени.
Инаку, двата Lamborghini, кои се сретнаа на бензинската во моментот на инцидентот, а се гледаат на видеото, се учесници на ревијална трка „Goldrush“.
Ова ревијално возење низ Америка започна во Бостон на 22 јуни, а целта беше во Лас Вегас, изминатиов викенд.
Моделот Huracan Performante, дебитираше на саемот на автомобили во Женева во 2017 година. Овој автомобил за погон користи 5.2 литарски V10 мотор со 631 коњски сили. Од 0 до 100 километри на час забрзува за само 2,9 секунди.
Почетната цена на овој модел во САД изнесува 274.390 долари.